Húsnæðið að Reykjavíkurvegi 74 sem er ein af þeim eignum sem Reginn hf. keypti á árinu 2010 er nú komið í mjög viðunandi nýtingu.

Húsið sem var allt endurbyggt utan sem innan árið 2006 með mjög vönduðum hætti er um 2.000 m². Eignin er vel staðsett við meginstofnbraut í Hafnarfirði. 

Fyrirtækin í húsinu eru þrjú, þ.e. Actavis sem leigir 2. hæð og kjallara, Medor sem leigir 3. hæð og hluta 1. hæðar og veisluþjónusta Matbær ehf. sem leigir megnið af 1. hæð en þar var áður veitingastaður og veislu- / ráðstafnusalir. Leigusamningar eru á bilinu 5 – 7 ára en leigusamningur við Matbæ ehf. er skammtímasamningur.

Það er hugmynd Regins að breyta þeim hluta 1. hæðar hússins sem nú er undir veisluþjónustu og veitingarekstur í skrifstofurými. Alls er það um 600 m².

Nú standa yfir framkvæmdir í göngugötu Smáralindar þar sem verið er að undirbúa opnun dönsku keðjunnar Joe & the Juice. Staðurinn mun bjóða upp á holla ávaxtadrykki, samlokur og kaffi. Ráðgert er að staðurinn opni á næstunni.

Ný verslun mun einnig opna 22. ágúst í Smáralind en það er franska fylgihlutakeðjan MOA. Þar verður að finna fjölbreytt úrval fylgihluta s.s. skartgripi, töskur, skó og slæður. Þetta er fyrsta verslun MOA á Íslandi en fyrirtækið var stofnað árið 2002 í París og rekur nú um 100 verslanir í 10 löndum.

Upplýsingar og fréttir frá Smáralind má finna á heimasíðu og Facebook síðu Smáralindar.

Nýverið hófust framkvæmdir við endurnýjun og uppfærslu Ofanleitis 2.

Húsnæðið er 8.012 m² skrifstofuhúsnæði en Verkís mun flytja alla starfsemi sína þangað seinna á árinu.

Verkís er elsta verkfræðistofa landsins, en með flutningi í Ofanleiti 2 sameinast öll starfsemin á einum stað á höfuðborgarsvæðinu.

Í gær, 11.júlí, var undirritaður leigusamningur við Mentor um eina hæð í Fellsmúla 26 í Reykjavík. Samningurinn er til 3 ára og er ráðgert að fyrirtækið flytji starfsemi sína í mánuðinum.

Mentor hefur þróað upplýsingakerfi sem er notað af skólum, sveitarfélögum og íþróttafélögum í nokkrum löndum. Mentor kerfið er heildstætt upplýsinga- og námskerfi fyrir alla sem starfa með börnum í skólum og tómstundastarfi. Nýlega var Mentor valið eitt af þremur framsæknustu tæknifyrirtækjum í Evrópu á sviði menntunar á ráðstefnunni EdTech Europe 2013. Sjá meira á heimasíðu fyrirtækisins hér.

Dótturfélag Regins hf., Reginn A1 ehf., hefur undirritað samkomulag við óstofnað félag kröfuhafa þrb. Norðurturnsins ehf. um heildsöluleigu á tveimur hæðum Norðurturnsins. Aðilar að samkomulaginu eru einnig Byggingafélag Gylfa og Gunnars ehf. Hið óstofnaða félag verður eigandi turnsins.

Um er að ræða leigu á 1. og 2. hæð Norðurturnsins sem tengist Smáralind á báðum hæðum, leigusvæði getur orðið allt að 2.500 m². Samkomulag er háð fyrirvörum þar á meðal um fjármögnun byggingu hans.

Reginn A1 mun í framhaldi framleigja allt rýmið til þriðja aðila, nú þegar hefur verið undirritað samkomulag við Baðhúsið ehf. um gerð leigusamnings á 2. hæð Norðurturnsins með tengingu og aðkomu inn í Smáralind á 2. hæð.

Að mati Regins þá hefur ofangreint samkomulag og samningar ekki teljandi bein áhrif á afkomu félagsins, sem og er fjárhagsleg áhætta Regins lítil. Það er hinsvegar mat Regins að útleiga turnsins að hluta eða öllu leyti muni hafa mjög jákvæð áhrif á rekstur og starfsemi þeirra félaga sem starfandi eru í Smáralind.

Á myndinni má sjá fulltrúa Regins og eigenda Norðurturnsins

Tvær nýjar verslanir bætast við úrvalið í Smáralind í sumar.
Danska undirfatakeðjan Change opnaði 7. júní síðastliðinn á 2. hæð, en þetta er eina verslun Change á Íslandi. Þann 8. ágúst næstkomandi mun alþjóðlega tískufatakeðjan Esprit einnig opna verslun en þar verða í boði vörur fyrir bæði dömur og herra.

Sú nýjung að bjóða erlendum ferðamönnum upp á rútuferðir frá miðbæ Reykjavíkur í Smáralind hefur einnig bæst við þjónustu á vegum Smáralindar og byrjuðu ferðir rútunnar nýlega. Frá og með 27. júní verða fjórar ferðir frá miðbæ Reykjavíkur í Smáralind og fimm ferðir til baka alla virka daga og á laugardögum. Fleiri ferðir verða á fimmtudögum vegna lengri opnunartíma og þrjár ferðir fram og til baka á sunnudögum.